पुणे : बालकलाकारांनी केलेले सुरेल जेंबेवादन, पाच वर्षांच्या चिमुरड्याचे मधुर बासरीवादन... विशेष विद्यार्थीनींनी सादर केलेली शिवस्तुती... आणि या बाल कलाकारांना रसिकांनी दिलेली भरभरून दाद...निमित्त होते बालदिन साजरा करण्यासाठी आयोजित करण्यात आलेल्या ‘मुकुल’ या कार्यक्रमाचे.
कलावर्धिनी चॅरिटेबल ट्रस्टच्या कलावर्धिनी नृत्यशाळेतर्फे ‘मुकुल’ या कार्यक्रमाचे आयोजन कोथरूड येथील बालशिक्षण सभागृहात करण्यात आले होते. नऊ ते चौदा वर्ष वयोगटातील शिष्यांना कलागुण सादर करता यावेत यासाठी कार्यक्रमाचे आयोजन दर वर्षी करण्यात येते. हे या कार्यक्रमाचे चौथे वर्ष होते.
यात अरुंधती पटवर्धन यांच्या शिष्या उन्मेशा बांदल, श्रावणी साने, प्रांजल केदारी, फाल्गुनी ओझा, राधिका कुंटे, रिया आढाव यांनी भरतनाट्यमची प्रस्तुती केली. अमोल निसाळ यांचे शिष्य मैत्रियी भोसले, रुचा महामुनी, शार्दुल काणे, करण देवगांवकर, केदार जोग व आलापिनी निसाळ यांनी गायन सादर केले. सौरभ वर्तक यांचे शिष्य आलाप चौधरी व अभिरा काळे यांनी आपल्या बासरीवादनाने उपस्थित रसिकांना मंत्रमुग्ध केले.
नेहा मुथीयन यांच्या शिष्या सारा मेहेंदळे, स्वरा कुलकर्णी, अदिती भांबुरकर, गार्गी शास्त्री, सानिका धीडे, तन्वी लिमये, सिया मुथीयन यांनी कथकद्वारे गणेश वंदना सादर केली. शिल्पा दातार यांच्या शिष्या फातिमा शेख, कोमल दुधाने, रिंकीता रणपिसे, गौरी लोंढे व नुसरत मुजावर या विशेष विद्यार्थीनींच्या कथक सादरीकरणाला रसिकांनी विशेष दाद दिली.
कार्यक्रमाचे सूत्रसंचालन सायली व सागरिका यांनी केले.